एन्फा महिला लिगका लागि १४ टोली प्रतिस्पर्धामा, उत्कृष्ट पाँच मात्र छनोट हुने

काठमाडौं  : अखिल नेपाल फुटबल संघ (एन्फा) ले राजधानीमा बिहीबारदेखि महिला लिग छनोट प्रतियोगिता सुरु गर्ने भएको छ। यस प्रतियोगितामा देशभरका १४ टोली सहभागी हुनेछन्, जसबाट उत्कृष्ट पाँच टोली एन्फा महिला लिगका लागि छनोट हुनेछन्।

एन्फाका प्रवक्ता सुरेश शाहका अनुसार प्रतियोगिताको सम्पूर्ण तयारी पूरा भइसकेको छ। खेलहरू सातदोबाटोस्थित एन्फा कम्प्लेक्स र च्यासल मैदानमा हुनेछ। सहभागी टोलीलाई दुई समूहमा विभाजन गरिएको छ।

समूह ‘ए’ मा — चर्च ब्वाइज युनाइटेड, छहारी फुटबल क्लब, राप्ती एफसी, सिन्धुपाल्चोक एफसी, स्टुडेन्ट फुटबल क्लब, आरबी रिसोर्ट एन्ड बीच फुटबल, र एफसी रियल रहेका छन्।
समूह ‘बी’ मा — एनआरटी, सङ्कटा एफसी, बुटवल लुम्बिनी एफसी, एनबीएम पोखरा गर्ल्स एफसी, झापा एफसी, लम्की फुटबल एन्ड ट्रेनिङ सेन्टर, र नेपाल खेलकुद क्लब छन्।

उद्घाटन खेलमा एफसी रियल र छहारी फुटबल क्लब आमनेसामने हुनेछन्। खेल दिउँसो १ बजे सुरु हुनेछ।
एन्फाले यस प्रतियोगितालाई महिला फुटबलको विकास र प्रतिभा पहिचानको महत्वपूर्ण अवसरका रूपमा लिएको छ।