कालोबजारी गर्ने पशुपति अटो ग्यासलाई ३ लाख जरिवाना, उल्टै व्यवसायीलाई धम्की : ‘ग्यास दिन्नँ’
ललितपुर । ललितपुरको बालकुमारीस्थित पशुपति अटो ग्यास प्रालि माथि ग्यास बिक्री–वितरणमा अनियमितता र कालोबजारी गरेको आरोपमा सरकारी अनुगमन टोलीले कारबाही गरेको छ।
अटो व्यवसायीहरूले कम्पनीले पर्याप्त ग्यास हुँदाहुँदै पनि आफूहरूलाई सहज रूपमा ग्यास उपलब्ध नगराएको र ग्यास लुकाएर अन्यत्र बिक्री गर्ने गरेको भन्दै गुनासो गर्दै आएका थिए। सोही विषयमा समाचार सार्वजनिक भएपछि नेपाल सरकारको अनुगमन टोलीले कम्पनीमा पुगेर अनुगमन गरेको थियो।
अनुगमनका क्रममा टोलीले कम्पनीको ग्यास बिक्रीसम्बन्धी बिल तथा कागजात जाँच गरेको थियो। कागजात परीक्षणपछि कम्पनीलाई ३ लाख रुपैयाँ जरिवाना गरिएको अनुगमनसम्बन्धी कागजातमा उल्लेख छ।
तर, जरिवाना भएपछि पनि कम्पनीको व्यवहारमा सुधार नआएको व्यवसायीहरूले गुनासो गरेका छन्। उनीहरूका अनुसार कम्पनीका प्रतिनिधिले ‘ग्यास पम्प बन्द गरिदिन्छु, तिमीहरूलाई ग्यास दिन्नँ र जरिवाना पनि तिर्दिनँ’ भन्दै धम्की दिने गरेको आरोप छ।
व्यवसायीहरूले सरकारी निकायले कारबाही गरिसकेपछि पनि आफूहरूलाई धम्क्याउने र ग्यास नदिने अवस्था आउनु गम्भीर विषय भएको बताएका छन्। उनीहरूले ग्यासको नियमित आपूर्ति सुनिश्चित गर्न र कम्पनीको बिक्री–वितरण प्रणालीमा थप निगरानी गर्न सरकारसँग माग गरेका छन्।
ग्यास नपाउँदा अटो व्यवसायी तथा चालकहरू प्रत्यक्ष रूपमा प्रभावित हुँदै आएका छन्। उनीहरूका अनुसार ग्यास लिन घण्टौँ कुर्नुपर्ने र कतिपय अवस्थामा ग्यास नपाई फर्किनुपर्ने अवस्था छ।
व्यवसायीहरूले ३ लाख रुपैयाँ जरिवाना गरिएको विषयमा मात्रै नभई ग्यासको मौज्दात, बिक्री विवरण र वितरण प्रक्रियाको समेत विस्तृत छानबिन गर्न माग गरेका छन्।
यता, कम्पनीले व्यवसायीलाई धम्की दिएको तथा ग्यास लुकाएर कालोबजारी गरेको आरोपबारे आफ्नो आधिकारिक धारणा सार्वजनिक गरेको छैन। त्यसैले व्यवसायीहरूले लगाएका आरोपको थप पुष्टि सम्बन्धित निकायको छानबिनबाट हुन बाँकी छ।
सरकारी अनुगमनबाट जरिवाना भइसकेपछि पनि ग्यास आपूर्ति र व्यवसायीमाथिको व्यवहारमा प्रश्न उठेपछि अब सम्बन्धित निकायले यस विषयमा थप निगरानी र आवश्यक कारबाही गर्नुपर्ने देखिएको छ।
