नगरकोट भ्रमण वर्ष २०८२: होटल व्यवसायीले पर्यटकलाई १० प्रतिशत छुट दिने
काठमाडौँ : नगरकोट भ्रमण वर्ष २०८२ को अवसरमा नगरकोटका होटल व्यवसायीहरूले यहाँ आउने पर्यटकलाई १० प्रतिशत छुट दिने घोषणा गरेका छन्। चाँगुनारायण नगरपालिकामा आयोजित छलफलमा भक्तपुरका चार नगरपालिकाका प्रमुख तथा जनप्रतिनिधिहरूको उपस्थितिमा यो निर्णय गरिएको हो।
चाँगुनारायण नगरप्रमुख जीवन खत्रीका अनुसार, भ्रमण वर्ष सफल बनाउन होटल व्यवसायीहरूले वर्षभर छुट दिने प्रतिबद्धता जनाएका छन्। स्थानीय तह र व्यवसायीहरूले नगरकोटको पर्यटन प्रवर्द्धनका लागि सरसफाइ, पूर्वाधार निर्माण, प्रचारप्रसार तथा स्वागत व्यवस्थामा विशेष ध्यान दिने बताएका छन्।
नगरकोट भ्रमण वर्षको तयारीस्वरूप नगरपालिकाले सडक सुधारका लागि टेन्डर आह्वान गरिसकेको छ। साथै, नगरकोट नाल्दुम पर्यटन विकास समितिले उद्घाटन समारोहको तयारीलाई अन्तिम चरणमा पुर्याएको छ। भ्रमण वर्षलाई सफल बनाउन चार नगरपालिकाहरू—चाँगुनारायण, मण्डनदेउपुर, बनेपा, र शङ्करापुर—ले संयुक्त रूपमा काम गर्ने बताएका छन्।
