काठमाडौं : नेपाल प्रिमियर लिग(एनपीएल)मा आजको पहिलो खेलमा लुम्बिनी लायन्सविरुद्ध चितवन राइनोजले टस जितेको छ।
टियु क्रिकेट मैदानमा टस जितेर चितवनका कप्तान कुशल मल्लले पहिले बलिङ रोजेका हुन्।
खेलेका सबै ४ मा पराजित लुम्बिनीले दबाबमा छ। आजको खेल पनि गुमाएमा लुम्बिनीको प्लेअफ सम्भावना निकै कमजोर हुनेछ।
लुम्बिनी विराटनगर किंग्स, पोखरा एभेन्जर्स, सुदूरपश्चिम रोयल्स र जनकपुर बोल्ट्ससँग पराजित भएको थियो।
चितवन भने ४ खेलमा ३ जित र १ हारका साथ अंक तालिकाको तेस्रो स्थानमा छ। सुरुवाती दुई खेल जितेको चितवन तेस्रो खेलमा भने पराजित भएको थियो। काठमाडौं र पोखरालाई पराजित गरेको चितवन कर्णालीसँग हारेको थियो।
पछिल्लो खेलमा भने चितवनले प्रतियोगिताकै बलियो मानिएको टोली सुदूरपश्चिम रोयल्सलाई पराजित गरेको थियो।
चितवनले आइतवार सुदूरपश्चिम रोयल्ससँग खेलेको टिममा २ परिवर्तन गरेको छ। चितवनले हसन इसाखिल र दिपक बोहारालाई बेन्चमा राख्दा ल्युक बेनकेनस्टन र नर बहादुर सार्कीलाई खेलमा मौका दिएको छ।
सार्कीको यो एनपीएल डेब्यु खेल हो। घाइते भएर एनपीएल गुमाएका कमलसिंह ऐरीको स्थानमा सार्कीलाई टिममा राखिएको थियो।