काठमाडौँ : जनता समाजवादी पार्टीका सांसद वीरेन्द्रप्रसाद महतोले प्रदेशहरुमा भुगोल र जनसङ्ख्याको आधारमा बजेट छुट्याउनुपर्ने बताउनुभएको छ ।
सोमवार प्रतिनिधि सभा बैठकमा आ.व. २०८१÷०८२ को राजश्व र व्ययको वार्षिक अनुमान माथिको सामान्य छलफलका क्रममा बोल्दै सांसद महतोले प्रदेशहरुमा भुगोल र जनसङ्ख्याको आधारमा बजेट छुट्याउनुपर्ने बताउनुभएको हो । उहाँले प्रदेश र स्थानीय तहको बजेट कटौती गर्नु नहुने बताउनु भयो । उहाँले संघीयालाई सवल बनाउनका लागि प्रदेश र स्थानीय तहलाई अझ बजेट आवश्यक पर्ने बताउनु भयो ।
उहाँले भन्नुभयो – ‘सुन्नमा आएको छ प्रदेशको, स्थानीय तहको बजेटहरुमा कटौती गरेका छौँ । मलाई लाग्छ संघीयतालाई सवल बनाउनको लागि अहिले झन बढी बजेटको आवश्यकता भएको हुँनाले बजेट कटौती नगरिदिन अनुरोध गर्न चाहन्छौँ । बजेट छुट्याउँदाखेरी भुगोल र जनसङ्ख्याको आधारमा प्रदेशहरुमा बजेट छुट्याउन सक्यौँ भने त्यसको अर्थ हुन जान्छ । बजेट कार्यान्वयनको चुनौती देखिएको छ । बजेटको आम लक्ष्य पुरा हुनका लागि बैंकमा रहेको तरलता बिस्तारै बजारमा जान, पुँजी बजार र रियलस्टेटमा आशाको किरण ल्याउन जरुरी छ ।’
त्यस्तै छलफलमा बोल्दै जनता समाजवादी पार्टी, नेपालका सांसद प्रकाश अधिकारीले बजेट समाजवादउन्मुख हुन नसकेको बताउनु भयो । उहाँले राज्यले दायित्व नबेहोरेको स्थितिको बजेट भएकाले समाजवादउन्मुख भन्न नमिल्ने बताउनु भयो ।
उहाँले भन्नुभयो – ‘समाजवादउन्मुख बजेट भनिएको छ । तर समाजवादउन्मुख बजेटको कार्यान्वयनमा राज्यले दायित्व बेहोरेको स्थिति देखिदैन । राज्यले सबै नीजि क्षेत्रलाई विकास गर्ने, विस्तार गर्ने जिम्मेवारीमा छाडिदिएको छ । कसरी हुन्छ यो समाजवादउन्मुख बजेट ? आर्थिक नीति ? यसैमा पहिलो प्रश्न छ ।’
सांसद अधिधारीले कृषिमा लगानी दशक घोषणा गरिएपनि वैज्ञानिक कृषि प्रणालीको कुनै योजना नदेखिएको बताउनु भयो ।