एसीसी महिला प्रिमियर कप क्रिकेट प्रतियोगिताको क्वार्टरफाइनलमा नेपाल थाइल्याण्डसँग ५७ रनले पराजित भएको छ। जितका लागि १३१ रनको लक्ष्य पछ्याएको नेपालले निर्धारित २० ओभरमा ७ विकेट गुमाएर ७४ रन मात्र बनाउन सक्यो।
नेपालका लागि कप्तान रुबिना क्षेत्रीले सर्वाधिक २० रन बनाइन्। उनले २३ बलमा ३ चौका प्रहार गरिन्। सोनी पाख्रिनले १५ रन जोड्दा सम्झना कुमारी र सीता राना मगरले समान १२–१२ रनको योगदान दिए।
थाइल्याण्डका बलर थिपाचा पुथावोङ, सुनिता चतुरोङराताना र सुलिपोर्न लाओमीले समान २–२ विकेट लिए। फानिता मायाले १ विकेट हात पारिन्।
यसअघि क्वालालम्पुरस्थित बायुएमास क्रिकेट ओभलमा टस जितेर पहिले ब्याटिङ गरेको थाइल्याण्डले निर्धारित २० ओभरमा ४ विकेट गुमाएर १३० रन बनाएको थियो।
थाइल्याण्डको जितमा विकेटकिपर नानापट खाचारेनकाइले अर्धशतकीय इनिङ्स खेलिन्। उनले ५१ बलमा ६ चौकाको मद्दतले ६२ रन बनाइन्। ओपनर फानिता मायाले २१ बलमा २६ रन जोड्दा चानिदा सुथिरुवाङले १६ रनको योगदान दिइन्।
नेपालका लागि कविता कुँवर, रिया शर्मा र रुबिना क्षेत्रीले समान १–१ विकेट लिए।
यस जितसँगै थाइल्याण्ड प्रतियोगिताको सेमिफाइनलमा प्रवेश गरेको छ भने नेपालको उपाधि यात्रा क्वार्टरफाइनलमै टुंगिएको छ।