काठमाण्डाै: सभामुख देवराज घिमिरेले राष्ट्रिय दल नेपाली कांग्रेस, नेकपा एमाले, नेकपा माओवादी केन्द्र, राष्ट्रिय स्वतन्त्र पार्टी र राष्ट्रिय प्रजातन्त्र पार्टीका प्रमुख सचेतक/सचेतकलाई छलफलका लागि बोलाउनुभएको छ । छलफल केहीबेरमा सिंहदरबारमा शुरू हुँदैछ ।
प्रमुख प्रतिपक्ष दल माओवादी केन्द्रले प्रतिनिधिसभा बैठक अवरोध गर्ने जनाएपछि सभामुख घिमिरेले दलहरूलाई छलफलका लागि बोलाउनुभएको हो । माओवादीले ‘हिंसा’ शब्द नसच्याएसम्म बैठक अवरुद्ध गर्ने जनाएको छ ।
भदौ १२ गतेको प्रतिनिधिसभा बैठकमा एमाले सांसद योगेशकुमार भट्टराईले माओवादी जनयुद्धलाई हिंसाको टिप्पणी गर्नुभएको थियो । संसद् सचिवालयको परामर्श लिएर सभामुख घिमिरेले गएको बुधवार बसेको बैठकमा ‘हिंसा’ शब्द असंसदीय नभएको रुलिङ गर्नुभएको थियो । सभामुखले हिंसा शब्द अभिलेखबाट हटाउन नपर्ने निर्णय लिएपछि प्रमुख प्रतिपक्षी दल माओवादी केन्द्रले संविधान र कानून विपरीत शब्द प्रयोग भएको भन्दै आपत्ति जनाउँदै आएको छ ।