काठमाडौँ : काठमाडौंमा शिक्षकहरूले संसदमा दर्ता गरिएको विद्यालय शिक्षा विधेयकको विरोधमा आन्दोलन गर्दै निषेधित क्षेत्र तोड्ने प्रयास गरेका छन्। नयाँ बानेश्वरमा प्रदर्शनका क्रममा सुरक्षाकर्मी र शिक्षकहरूबीच धकेलाधकेल भएको छ। शिक्षकहरूले निषेधित क्षेत्रमा प्रवेश गर्न खोज्दा प्रहरीले हस्तक्षेप गरेको छ ।
शिक्षकहरूको आन्दोलनका कारण देशभरका विद्यालयहरू बन्द भएका छन्, जसले गर्दा कक्षा १२ को परीक्षा सार्नुपर्ने अवस्था आएको छ । शिक्षकहरूले विधेयकमा रहेका प्रावधानहरू, जस्तै शिक्षकलाई पालिकामातहत राख्ने व्यवस्था, अस्थायी शिक्षकहरूको स्थायीकरण, र तलब तथा भत्तासम्बन्धी विषयहरूमा असन्तुष्टि जनाएका छन् ।
सरकार र शिक्षक महासंघबीच वार्ता प्रयासहरू भए पनि सहमति हुन सकेको छैन। शिक्षक महासंघले मागहरू पूरा नभएसम्म आन्दोलन जारी राख्ने चेतावनी दिएको छ ।