काठमाडौं : काठमाडौं सडक डिभिजन कार्यालयले सहरी क्षेत्रलाई खाल्डाखुल्डी–रहित बनाउन थालेको विशेष अभियानले सडक मर्मतको काम तीव्र भएको छ। पहिलो चरणमा चक्रपथभित्रका अधिकांश सडक मर्मत पूरा हुँदै अब चक्रपथबाहिरका क्षेत्रतर्फ ध्यान केन्द्रित गरिएको छ।
उक्त अभियानलाई थप प्रभावकारी बनाउन डिभिजनले ‘सडक पोटहोल मर्मत एम्बुलेन्स’ सेवा सञ्चालनमा ल्याएको छ, जसले खाल्डो–खानेरेका स्थान तत्काल सुधार गर्न सहयोग पुर्याइरहेको छ।
एम्बुलेन्स र मोबाइल एपबाट सेवा अझै छरितो
मंसिर ११ गते भौतिक पूर्वाधार तथा यातायात मन्त्री कुलमान घिसिङले पोटहोल मर्मत एम्बुलेन्स र रोड मेन्टिनेन्स साइट रेस्क्यु मोबाइल एप औपचारिक रूपमा शुभारम्भ गरेपछि सेवा अझै सहज बनेको छ।
डिभिजनका इन्जिनियर रामचन्द्र फुयाँलका अनुसार एम्बुलेन्समार्फत ४७२ किलोमिटर सडकलाई पूर्ण रूपमा खाल्डाखुल्डी–रहित बनाउने लक्ष्य छ।
यो सेवा वर्षभरि २४ घण्टा, आपतकालीन अवस्थासमेत निरन्तर सञ्चालन हुने बताइएको छ।
राति अधिक काम, दिनमा अत्यावश्यक मर्मत
मूलपानी क्षेत्रमा खटिएका इन्जिनियर फुयाँलका अनुसार अत्यधिक सवारी चापका कारण अधिकांश मर्मतकार्य रातिको समयमा गरिन्छ।
उनका शब्दमा,
“दिनमा अत्यावश्यक सडकमा मर्मत हुन्छ, तर मुख्य काम रातमै अघि बढाइन्छ।”
स्वचालित साधनसहित अत्याधुनिक एम्बुलेन्स
पोटहोल मर्मत एम्बुलेन्समा ५० डिग्री तापक्रममा इमल्सन तताउने, स्प्रे गर्ने, खाल्डो काट्ने, हावा तथा पानीले सफा गर्ने सबै स्वचालित प्रणाली उपलब्ध छन्।
डिभिजनका अनुसार यसले मर्मत कार्यलाई छिटो, सफा र दीर्घकालीन बनाउनेछ।
मोबाइल एपबाट सूचना, तुरुन्तै मर्मत
‘रोड मेन्टिनेन्स साइट रेस्क्यु’ एपमार्फत सडक मर्मत आवश्यक स्थानबारे सूचना संकलन गरिन्छ।
जुन सूचना आएसँगै तत्काल टोली खटाइने र मर्मत प्रक्रिया अघि बढाइने डिभिजनले जनाएको छ।