काठमाडौं : सामाजिक सञ्जालमार्फत चरित्रहत्या र गाली–बेइज्जती गरेको आरोपमा पक्राउ परेका नेकपा एमालेका केन्द्रीय सदस्य ऐन महर हाजिरी जमानीमा छुटेका छन्।
विद्युतीय अपराधसँग सम्बन्धित उजुरीका आधारमा प्रहरीले महरलाई पक्राउ गरेको थियो। साइबर ब्युरोका प्रवक्ता दीपकराज अवस्थीका अनुसार उजुरी दर्ता भएपछि प्रहरीले जिल्ला अदालत काठमाडौंसँग पक्राउ पुर्जी माग गरेको थियो।
अदालतले भदौ ९ गते नै पक्राउ पुर्जी जारी गरेपछि महरलाई बुधबार प्रहरीमा उपस्थित गराइएको थियो। त्यसपछि उनीलाई पक्राउ गरी थप अनुसन्धानका लागि म्याद थप गर्ने प्रक्रिया अघि बढाइएको थियो।
प्रारम्भिक अनुसन्धानपछि अदालतले महरलाई हाजिरी जमानीमा रिहा गर्ने आदेश दिएको हो। तर, उनीमाथिको अनुसन्धान भने अझै जारी रहने प्रहरीको भनाइ छ।
ऐन महर विगतमा पनि विवादमा तानिँदै आएका नेता हुन्।
-
उनीमाथि यसअघि एक महिलाले बलात्कारको आरोप लगाउँदै प्रहरीमा जाहेरी दर्ता गरेकी थिइन्।
-
यौन विचलनमा परेको अडियो सार्वजनिक भएपछि एमालेले उनलाई निलम्बन गरेको थियो। तर, पछि पार्टी सचिवालय बैठकबाट पुनः जिम्मेवारीमा फर्काइएका थिए।
बझाङका स्थायी निवासी महर एमाले निकट विद्यार्थी संगठन अनेरास्ववियुका अध्यक्ष हुँदै पार्टीको राष्ट्रिय राजनीतिमा प्रवेश गरेका हुन्।
२०७९ सालको प्रतिनिधिसभा निर्वाचनमा उनले बझाङबाट उम्मेदवारी दिएका थिए तर नेकपा (एकीकृत समाजवादी) का नेता भानुभक्त जोशीसँग पराजित भए।
२०७८ मंसिरमा उनलाई एमालेले केन्द्रीय सदस्यमा मनोनीत गरेको थियो।
लगातार विवादमा परिरहेका महरबारे पार्टीभित्र पनि आलोचना बढ्दै गएको छ। सामाजिक सञ्जाल प्रकरणमा अदालतबाट अस्थायी छुट पाए पनि, कानुनी प्रक्रिया र राजनीतिक भविष्यबारे अझै अन्योल यथावत छ।