काठमाडौँ : लामो प्रतीक्षा र आन्दोलनपछि उखु किसानले पाउने अनुदान रकम अन्ततः निकासा भएको छ। मंगलबार अर्थ मन्त्रालयले ७५ करोड ४९ लाख ३८ हजार २४० रुपैयाँ अनुदानका लागि छुट्याएको हो। अब यो रकम जिल्लास्तरीय कोष तथा लेखा नियन्त्रकको कार्यालयमार्फत किसानका व्यक्तिगत बैंक खातामा बिहीबारसम्म जम्मा हुने कृषि तथा पशुपन्छी विकास मन्त्रालयले जनाएको छ।
किन ढिलाइ भयो?
यसअघि मन्त्रिपरिषद् बैठकले किसानलाई प्रतिक्विन्टल ३५ रुपैयाँका दरले अनुदान दिने निर्णय गरिसकेको थियो। तर, अर्थ मन्त्रालयले प्राविधिक कारण देखाउँदै रकम निकासा गर्न ढिलाइ गर्यो। निकासा ढिलाइ हुँदा किसानहरूले असन्तुष्टि जनाउँदै काठमाडौंमा आन्दोलनसमेत गरेका थिए।
उखु किसानहरू विगतमा प्रतिक्विन्टल ७० रुपैयाँसम्म प्रोत्साहन पाउँदै आएका थिए। तर, यो पटक सरकारले आर्थिक अवस्था र प्राथमिकता हेरेर रकम घटाएर ३५ रुपैयाँ मात्र उपलब्ध गराउने निर्णय गर्यो। कृषि मन्त्रालयले पनि किसानलाई पुरानै दरमा सुविधा दिन प्रस्ताव राखेको थियो, तर अन्ततः अर्थतन्त्रको अवस्था अनुसार रकम आधा गरिएको हो।
किसानहरूको आन्दोलनलाई सम्बोधन गर्न कृषि मन्त्रालयले सिंहदरबारमा वार्ता आयोजना गर्यो। वार्तामा मन्त्रालयका तर्फबाट कृषि विभागका उपमहानिर्देशक ललनकुमार सिंह, उपसचिव लालकुमार श्रेष्ठ र मणिरत्न अर्याल सहभागी भए भने उद्योग मन्त्रालयका प्रतिनिधिहरू पनि सामेल थिए। किसानतर्फबाट श्यामबाबु रायलगायत नेताहरूले सहभागिता जनाए।
यसअघि, कृषि तथा पशुपन्छी विकासमन्त्री रामनाथ अधिकारीले उपमहानिर्देशक सिंहको संयोजकत्वमा चार सदस्यीय वार्ता टोली गठन गरेका थिए।
अब निकासा भएको रकम बिहीबारसम्ममा खातामा पुग्ने निश्चित भएपछि किसानहरू केही हदसम्म राहत पाउने भएका छन्। तर, उनीहरूले पुरानै दर (७० रुपैयाँ) कायम गर्नुपर्ने माग अझै पनि छोडेका छैनन्।